Under ein nyttårsmaskerade blir Oddny Vangen funne drepen utanfor festlokalet. Det er uklart kven som kan ha hatt motiv for å ta livet av den ugifte 42-åringen, men etter kvart kjem stadig meir av hennar liv og hemmelege draumar for ein dag. Året er 1970, og politietterforskar Mons Strand er attende i den same bygda han løyste ei mordsak nokre år tidligare. Han er snart innblanda i dramatiske hendingar, styrt av sladder, sjalusi, erotikk, misunning og hat.
Lensmannen heldt eit fotoalbum i eine handa. Han slo opp og viste Mons Strand ei side der det var limt inn eit stort avisbilde av Erik Bye. Rundt bildet var det teikna eit hjarta. På eit anna bilde stod han med armen rundt eit menneske, men det var ikkje godt å vita kven det hadde vore, for her hadde Oddny Vangen limt inn eit foto av seg sjølv, slik at det såg ut som om det var henne Erik Bye heldt eit godt tak rundt.
Dette er andre boka om etterforskar Mons Strand frå Kripos. Også Klara Viken frå debutboka «Varselet» er med, nå er ho 15 år. Men det handlar meir om venninna hennar, Unni Sletta, som saman med kjærasten finn den drepne kvinna. Unni er lei og i sterk opposisjon til foreldra sine, som begge har viktige roller i boka.