Ny krimbok: Stjernefallet
Endeleg ny krimbok! Handlinga i denne boka er lagt til Finnskogen. Journalist Tuva Velid har fått intervjuavtale med tidlegare skodespelar Eva Lindbo. Lindbo var ei stor stjerne før ho ein del år tidlegare brått trekte seg frå rampelyset. Den siste tida har ho budd åleine på Finnskogen.
Ei melding som Tuva Velid har fått frå henne, tyder på at ho har noko viktig å fortelja. Men da journalisten kjem til huset, finn ho Lindbo død. Politiet får raskt mistanke om at det ligg noko kriminelt bak. Eva Lindbo har ikkje hatt kontakt med familien sin på mange år, men det kjem fram at like før ho døydde, har både dottera og eksmannen vore på besøk og hatt opprivande møte med henne.
Tuva Velid nøster vidare i historia til den døde. Kvifor trekte Lindbo seg frå draumerolla? Kva var det ho hadde funne ut om sorg og overgrep?
Ein lokal slektsforskar kan fortelja at far til Lindbo, Karl Jørgensen, i 1956 vart skulda for eit drap. Han hadde i mange år vandra på Finnskogen. Eitt eller anna hadde skjedd mellom tateren Jørgensen og vennen hans av bondeslekt. Historia om Karl og buroen Wilhelm er ei parallellforteljing i boka.
Nytt denne gongen er at eg etter 19 bøker nå gjev ut på eige forlag, Juva. Det har vore ei spennande erfaring. Håper boka blir å få tak i på bibliotek og i bokhandlar. Den som ønskjer å kjøpe boka direkte, kan sende meg melding.
Slik opnar boka:
Langt inne på Finnskogen, på den svenske sida av riksgrensa, oppstod ein gong eit fenomen ingen kan forklare. Eit korsmerke i jorda. Korset er tydeleg og har vore der så lenge folk i området kan hugse. Ingen veit opphav eller årsak. Vegetasjonen har aldri klart å fjerne det. Det er som eit sår som aldri vil gro.
Forskarar har studert det og prøvd seg med forklaringar, utan at folk blir så særleg klokare.
Folk som hadde levd her før, ante makter i jorda. Staden har derfor hatt ein mystikk over seg. Noko uforklarleg, som samtidig var skremmande. Kvilte det ei forbanning over staden, eller var korset eit godt teikn?
Akkurat på denne staden fann dei liket. Den døde var plassert over korset i marka. Rundt stod granskogen tett og tung.
Sjølve ansiktet til mannen såg fredfullt ut, som om døden hadde kome roleg og forsonande. Men eit dødt ansikt teier om det som skjedde sekunda før. Eventuell smerte, liding og angst blir viska ut. Det var likevel ingen tvil om at den som låg her, hadde kjent både smerte og angst før døden overtok. Skadar i bakhovudet tydde på harde slag. I eit sår på venstre side av brystet stod ein kniv, som eit punktum på det heile. Kniven var ikkje stor, og skaftet hadde inngravert eit sirleg mønster.
Kva var det for drama som enda her?
Nytt opplag
Ungdomsboka «Avlyst på grunn av sorg» har nå kome i nytt opplag. Det er alltid gledeleg når bøkene er utselde frå forlaget, og det må trykkast fleire.
Litteratursymposiet i Odda
Litteratursymposiet i Odda er i år 8.-10. oktober. I samband med det skal eg på forfattarbesøk på fleire skolar i Ullensvang 7.-9. oktober. Røldal skule, Skare skule, Opedal skule, Kinsarvik skule og Tyssedal skole. På dei fleste skolane skal eg møte mellomtrinnet, så da skal eg snakke mest om mysterieserien (Motorsykkelmysteriet, Hyttemysteriet og Bjørnemysteriet). I Kinsarvik skal eg også besøkje ungdomstrinnet, da vil eg snakke om den nyaste boka, Avlyst på grunn av sorg.
Symposiet byr på mykje godt program utanom det skolane får. Her er programmet
http://www.litteratursymposiet.no/program
Falturiltu
I november skal eg delta på Falturiltufestivalen på Stord.
Falturiltu er verdas største nynorske barnebokfestival, og den går føre seg på Stord i veke 45 kvart år. Eg skal mellom anna snakke om «Avlyst på grunn av sorg».
Diktardagar 2020
Programmet for Diktardagar 2020 er klart. I år blir det ei avgrensa utgåve av desse litteraturdagane på grunn av koronaen.
I årets program er hovudteamet to jubileum, 100 år sidan Knut Hamsun fekk Nobelprisen, og 100 år sidan Kjell Aukrust vart fødd. Aukrust hadde far frå Lom og skreiv mellom anna om Flåklypa, som er ein konkret plass i Bøverdalen.
Diktardagar er litteraturdagar i Lom, Skjåk og Vågå, som blir arrangert kvart år, første helga i september.
Eg sit i styret for Diktardagar, som representant frå Vennelaget Jan-Magnus Bruheim. Eit av oppdraga mine i år er å leia eit bokbad med Lars Mytting, Rønnaug Kleiva og Sigmund Løvåsen (som skriv biografi om Kjell Aukrust).
NRK-tilråding
Litteraturkritikare i NRK med tilråding om sju ungdomsbøker i haust. Blant dei er «Avlyst på grunn av sorg».
«Kjærlighetssorg, svik, vennskap, omsorgssvikt og overlevelsesvilje er sentrale temaer i denne fine fortellingen», skriv NRK-kritikarane Anne Cathrine Straum og Gry Elise Jacobsen.
Nytt opplag av «Det som er sant»
Det er alltid hyggeleg når bøkene er utselde frå forlaget. Dei tre første bøkene i serien om Kami og Bente har kome ut i pocket.
I haust kom det nytt opplag av ungdomsboka «Det som er sant».
Ny ungdomsroman
Avlyst på grunn av sorg (2019)
Kjensler i kaos. Eline blir dumpa av Jonas, brått og uventa, og opplever si første store kjærleikssorg. Snart går ho på nye, sviande nederlag.
I denne ungdomsromanen utforskar eg det store spekteret av kjensler som finst i ei kjærleikssorg. Eg stiller også spørsmål kring oppvekst, bakgrunn og kor ulike liv ein kan leve i Noreg i dag.
Dei 10 beste…
Nynorsksenteret, Pirion, Framtida.no og Framtidajunior.no har tatt initiativ til å kåra dei beste barnebøkene på nynorsk etter 2000. Juryen har valt 10 bøker, blant dei er «Motorsykkelmysteriet».
Kåringa er ein del av Bokåret 2019 og skal visa breidda i den nyare, nynorske barnelitteraturen skrivne av norske forfattarar.
«Motorsykkelmysteriet» på samisk
Den første boka i mysterieserien om Stian og Stine, finst også i samisk utgåve.