Velkomen til heimesida mi! På denne sida kan du lesa om meg og om bøkene mine.
Eg debuterte som forfattar i 1997 med krimromanen Varselet. Denne boka er inspirert av hendingar frå oppveksten min i Skjåk. Neste krimroman var Maskerade, som kom i 1999. Så følgde Utan englevakt, Svart arv og Dragsug. Nattskrik kom nokre år seinare. I 2024 kom så boka Stjernefallet, krim frå Finnskogen, som du kan lesa meir om HER.
I tillegg til krimromanar har eg skrive ein historisk roman, Trolldomskraft, som handlar om den siste trolldomssaka i Noreg. Det som ein gong var er ein oppvekstroman, som er delvis sjølvbiografisk.
Dei siste åra har eg gjeve ut mest barne- og ungdomsbøker, både seriar og andre bøker. Ungdomsromanen Ny melding er første bok i ein serie om dei to venninnene Kami og Bente. Dei andre bøkene i serien er Venneringen, På flukt og Blod på hendene. Eg har også gjeve ut eit par andre ungdomsbøker og ein mysterieserie for større barn.
Eg er fødd og oppvaksen i Skjåk i Gudbrandsdalen, men flytta derifrå tidleg i ungdomen. Likevel kjenner eg meg som skjåkver og har hus der. Etter at eg flytta ut, har eg budd mesteparten av åra i Oslo og i Lillehammer, der eg framleis bur.
Eg har bakgrunn som journalist i NRK, dei siste tiåra har eg i hovudsak levd av å vera forfattar.
Vil du vita meir, kan du gå på lenka Om meg og forfattarskapen.
